Bildiyimiz kimi, Yeni Azərbaycan ifadəsi müasir müstəqil Azərbaycanın memarı və qurucusu, Ulu Öndər Heydər Əliyev tərəfindən istifadə edilmiş və müstəqilliyin bərpasından sonra çağdaş, universal prinsiplərlə yanaşı, milli-mənəvi dəyərləri rəhbər tutaraq azərbaycançılıq, Azərbaycan millətçiliyi ideologiyası çərçivəsində dövlətçiliyin inşasını ehtiva edib. Bununla belə torpaqlarımızın bir hissəsinin işğal altında olması və Kürəkçaydan, Türkmənçaydan üzü bəri davam edən suverenlik əskikliyi Azərbaycan dövlətinə potensialına uyğun olaraq regional güc kimi refleks göstərməyə mane olurdu. Azərbaycan Silahlı Qüvvələrinin Prezident, Müzəffər Ali Baş Komandan İlham Əliyevin rəhbərliyi ilə Qarabağda tarixi Zəfər qazanması və ardınca 24 saatlıq lokal xarakterli antiterror tədbirləri ilə Azərbaycan dövlətinin beynəlxalq hüquqla tanınan ərazilərində suverenliyini tam bərpa etməsi XXI əsrin Yeni Azərbaycanının inşasını zəruri etmişdir. Bu məqsədlə institusional dəyişiklərin idarə edilməsi üçün növbədənkənar prezident seçkilərinin keçirilməsi zərurəti yaranmışdı.
Bu fikirləri Xəzər Universitetinin Siyasi elmlər və fəlsəfə departamentinin müdiri Orxan Vəliyev açıqlamasında deyib.
O.Vəliyev deyib ki, növbədənkənar prezident seçkilərini sadəcə yeni seçkilərin keçirilməsi kimi şərh etmək doğru deyil. Seçkilərin ilk dəfə Azərbaycanın bütün ərazilərində təşkil edilməsi və əsas namizəd İlham Əliyevin məhz Xankəndi şəhərində səs verməsi Azərbaycan dövlətinin suverenliyinin tam bərpasının nümayişi kimi qəbul edilməlidir. Prezident Əliyevin yerli mətbuata müsahibəsində də qeyd etdiyi kimi, bu prezident seçkiləri keçirilməli idi. Çünki prezident institutu dövlətin idarə edilməsində ən yüksək orqandır. Seçkilər müvəffəqiyyətlə baş tutdu və İlham Əliyev seçicilərin böyük əksəriyyətinin dəstəyini alaraq yenidən prezident seçildi. MSK-nın və müşahidəçilərin rəyləri seçicilərin müstəqillik dövründə görülməmiş fəallıq nümayiş etdirdiyini deməyə əsas verir. Bu da anlaşılandır, çünki artıq yeni və suveren Azərbaycan inşa olunmaqdadır və vətəndaşlar da 44 günlük Vətən müharibəsində olduğu kimi bu prosesin də subyekti olmağa can atırlar. Bu baxımdan Prezident İlham Əliyevin andiçmə mərasimi və həmin mərasimdən verəcəyi mesajlar həm Azərbaycan ictimaiyyəti, həm də beynəlxalq ictimaiyyət tərəfindən maraqla gözlənilirdi.
Prezident İlham Əliyevin andiçmə mərasimindəki nitqində postmünaqişə dövründə inşa edilməkdə olan Yeni Azərbaycanın prioritetlərini dərk etmək imkanı verdiyini vurğulayan O.Vəliyev bildirib ki, dövlətimizin başçısı çıxışına bütün nailiyyətlərin əsas mənbəyi olan Azərbaycan xalqına təşəkkür etməklə başladı. Buna müvafiq olaraq prezident 2003-cü ildə verdiyi bütün vədlərinin yerinə yetirildiyini bildirdi. Prezident bu vədlər arasında prioritet məsələnin Azərbaycanın ərazi bütövlüyünün bərpası olduğunu da xüsusi vurğuladı.
Qeyd edilib ki, güclü dövlət və Türk dünyası ilə əlaqədar prezidentin andiçmə mərasimindəki nitqində əsas ifadələr arasında yer almışdır. Prezidentin Türk dünyası ilə bağlı danışarkən “bizim ailəmiz” ifadəsini istifadə etməsi xüsusilə diqqəti cəlb etdi. Güclü dövlət zəfər, suverenliklə assosiasiya olunur. Türk dünyası vurğusu isə Şuşa Bəyannaməsində də əksini tapan “Bir millət, iki dövlət” prinsipinə əsasən davam etdirilən tərəfdaşlığın növbəti ifadəsi idi. Buna paralel olaraq Prezident İlham Əliyev ilk rəsmi səfərini gerçəkləşdirdiyi Türkiyə Respublikası Prezidentinin sarayında Türkiyə-Azərbaycan Universitetinin yaradılması ilə bağlı sənədin imzalanma prosesində dərinləşdirərək davam etdirdiyi gənclərin ailədə və məktəbdə milli-mənəvi ruhda tərbiyə edilməsi məsələsi də çox önəmlidir. Çünki güclü Azərbaycanın və əldə edilən nailiyyətlərin qorunması, gələcək nəsillərə ötürülməsi məhz milli-mənəvi ruhda tərbiyə ediləcək gənclər sayəsində mümkün olacaq.
“Prezident İlham Əliyevin xalqın dəstəyini qazanaraq prezident seçilməsi Azərbaycanın gələcəyi üçün olduqca zəruri idi. Hazırda siyasət qlobal qeyri-müəyyənlik içindədir və başda Avropa ölkələri olmaqla dünya dövlətləri güclü lider və ordu böhranı yaşamaqdadır. Halbuki Azərbaycan xalqı Qarabağda məhz güclü, qətiyyətli lideri və ordusu sayəsində adını müzəffər millət kimi tarixə yazdı. Seçkilərin bu çərçivədə müvəffəqiyyətlə tamamlanması Azərbaycan xalqının və dövlətinin gələcəyi üçün sabitlik mesajı kimi qəbul edilə bilər. Çünki Prezident İlham Əliyev müharibədə qazanılan şanlı Zəfərin məntiqi sonluğu olan sülh müqaviləsinin imzalanmasına da nail olacaq və adını 44 günlük Vətən müharibəsində olduğu kimi Azərbaycan siyasi tarixinə daha bir şərəfli səhifə yazdıracaq”, - deyə O.Vəliyev bildirib.