Bakı, 1 dekabr.

Rəqəmsal informasiya mühitinin sürətli inkişafı dövlətlər üçün aktual çağırışlar yaradır. Yeni texnologiyaların etik prinsiplər çərçivəsində istifadəsi, dezinformasiya ilə mübarizə, etibarlı informasiya mühitinin qorunması zəruri mövzular kimi qarşıda durur. Prezident İlham Əliyevin vurğuladığı kimi, bu gün media yalnız informasiya ötürücüsü deyil, həm də dövlətlərin nüfuzunun, beynəlxalq arenada mövqeyinin formalaşmasına mühüm təsir göstərən bir alətə çevrilib. Bakıda keçirilən Türk Dövlətləri Təşkilatının (TDT) Media Forumu qlobal informasiya mühitində formalaşan yeni çağırışlar üzrə müzakirələrin keçirilməsi, birgə mövqenin müəyyən edilməsi baxımından mühüm hadisə oldu.

Bu sözləri açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.

O bildirib ki, Bakı Forumu həm peşəkar media dialoqu, təcrübə mübadiləsi üçün şərait yaratdı, həm də Türk dünyasının siyasi, iqtisadi və mədəni inteqrasiyasını gücləndirən kommunikasiya platforması rolunu oynadı. Bu Forum Türk dünyasında informasiya əməkdaşlığının institusional çərçivədə möhkəmləndirilməsi baxımından strateji əhəmiyyət daşıyır.

“Media, kommunikasiya sahəsində inteqrasiya xalqlarımız, dövlətlərimiz arasında mədəni yaxınlaşmanı gücləndirir, informasiya təhdidlərini aradan qaldırmağa yardım göstərir. Bu cür tədbirlər sayəsində media qurumları arasında birbaşa əlaqələr formalaşır, məlumat mübadiləsi həyata keçirilir, ortaq layihələr gerçəkləşdirilir. Türkiyə, Qazaxıstan, Qırğızıstan, Özbəkistan, Şimali Kipr Türk Respublikasından gələn, Forumda iştirak edən nümayəndə heyətləri informasiya siyasətində ortaq mövqelərin müəyyənləşdirilməsi, vahid media məkanının inkişafına yönəlmiş müzakirələr apardılar. Bu tendensiya dövlətlərimiz arasında operativ və etimadlı xəbər mübadiləsini təmin etməklə yanaşı, regionumuzda informasiya təhlükəsizliyinin möhkəmləndirilməsinə xidmət edir. Nəzərə almaq lazımdır ki, yaşadığımız dövrdə beynəlxalq informasiya məkanında rəqabət sərtləşir, informasiya manipulyasiyaları çoxalır, dezinformasiya yayımı təhlükəli hal alır. Belə bir məqamda türk dövlətlərinin ortaq mövqedən çıxış etməsi onlar üçün qlobal informasiya məkanında daha effektiv iştirak imkanı yaradır. Bakı Media Forumu bütün bu ideyaların müzakirə olunması, ideyaların gerçəkləşdirilməsi yolunda vasitələrin tapılması baxımından mühüm əhəmiyyət kəsb etdi”, - deyə media eksperti vurğulayıb.