Məlum olduğu kimi cari ilin aprelin 5-də Ermənistan silahlı qüvvələri Azərbaycan Ordusunun müxtəlif istiqamətlərdə yerləşən bölmələrini ümumilikdə 30 dəfə, aprelin 6-sı saat 18:30-dan 22:05-dək isə Çəmbərək, Basarkeçər və Gorus rayonlarının Cil, Günəşli və Xoznavar yaşayış məntəqələri istiqamətlərində yerləşən mövqelərindən Ordumuzun Gədəbəy, Kəlbəcər və Laçın rayonlarının Əyrivəng, Cəmilli və Hacılar yaşayış məntəqələri istiqamətlərində yerləşən mövqelərini ümumilikdə 16 dəfə olmaqla, müxtəlif çaplı atıcı silahlardan fasilələrlə atəşə tutub. Eyni zamanda Ermənistan silahlı qüvvələrinin bölmələri növbəti təxribatlarına zəmin yaratmaq məqsədilə Azərbaycan Ordusunun Tovuz rayonunun Hacalı, Ağbulaq, Ağdam, Qaralar, Köhnə Qışlaq və Gədəbəy rayonunun Qalakənd yaşayış məntəqələri istiqamətlərindəki mövqelərinin qarşısında səngərin mühəndis cəhətdən təkmilləşdirilməsi işlərini görməyə cəhd göstəriblər.
Bütün bu məkirli planlar, xüsusilə doğma torpaqlarımızda törədilmiş təcavüz aktları bir daha onu göstərdi ki, Ermənistan vandalizm siyasətini davam etdirməkdədir. Vətən müharibəsidəki parlaq Qələbəmizdən, həmçinin 2023-cü ilin sentyabr döyüşlərindəki erməni separatizmini məhv edən növbəti “Dəmir yumruq”-dan ermənilər hələ də dərs çıxarmayıb. Əgər, bu terror-təxribat aktı davam edərsə Azərbaycan Ordusu növbəti dəfə erməni təcavüzkarlarını ağır şəkildə cəzalandıracaq. Azərbaycan Prezidenti Ermənistana bir tarixi şans verib. Odur ki, Ermənistan bu şansdan düzgün istifadə edib, öz xalqını uçurumdan xilas etməlidir. Bəli, Ermənistan Azərbaycanın sülh təklifini qəbul etməli, tarixi reallığı və həqiqətləri qəbul etməlidir. Bütün dünya şahid olur ki, Cənubi Qafqazın lider dövləti olan Azərbaycanın siyasəti sülh prinsiplərinə əsaslanır.
Azərbaycanın mövqeyi ədalətli və konstruktivdir. Ölkə Prezidenti cənab İlham Əliyevin yürütdüyü müdrik siyasət sadəcə Azərbaycana deyil, bütün Qafqaza davamlı sülh vəd edir. Riyakar havadarlarına güvənən Ermənistan təcavüzkar siyasətinə son verməli və bizim haqq-ədalətə əsaslanan mövqeyimizlə barışmalıdır.