Bu gün Heydər Əliyev Mərkəzində regionun qadın liderliyinə həsr olunan ən böyük tədbirlərindən biri olan altıncı “SHE Congress” tədbirinin açılış mərasimi keçirilir.
Tədbirdən öncə Azərbaycan Respublikasının Dövlət Himni səsləndirilib.
Tədbirdə çıxış edən “Azerbaijan Business Women” təşkilatının təsisçisi Tatyana Mikayılova deyib ki, tədbirin keçirilməsində əsas məqsəd qadınların qanun çərçivəsində hüquqlarının müdafiəsi və cəmiyyətdə qadınlarla kişilər arasında bərabərliyin, dayanıqlığın təmin olunmasıdır.
“Biz “SHE Congress”də qadınlar üçün toplaşmışıq və onların cəmiyyətdə bərabər hüquqları üçün mübarizə aparacağıq. Biz bunu yalnız sevgi və hörmət çərçivəsində həll etmək niyyətindəyik. Qadın üçün seçimin var olması çox vacibdir. Qadın ana, bacı, biznesmen, mühəndis, müəllimə və ya astronavt ola bilər. Əsas qadını seçim hüququndan məhrum etməməkdir”, - deyə Tatyana Mikayılova vurğulayıb.
Tədbirdə aktual mövzular, qadınların biznes və şəxsi inkişaf sahəsində qarşılaşdıqları çağırışların müzakirəsi aparılır. Konqresin mövzusu “İndinin gücü: Anı yaşa”dır (The Power of Now: Live the Moment!).
Tədbirin tərəfdaşları arasında Heydər Əliyev Mərkəzi, KOBIA, “Yelobank”, “Azercell”, “Mastercard”, “UN Global Compact”, “Crimson Education” və “Baku Media Centre” kimi nüfuzlu qurum və təşkilatlar yer alır.
Qeyd edək ki, “SHE (Smart, Happy, Equal) Congress”i ekspertləri, biznes liderlərini və sahibkarları bir araya gətirən unikal platformadır. 2017-ci ildə təsis edildiyi gündən bəri konqres ünsiyyət qurmaq, öyrənmək və təcrübə mübadiləsi aparmaq üçün imkanlar təqdim etməklə qadınların şəxsi və peşəkar inkişafını təşviq edir. Bu gün “SHE Congress” Azərbaycanda və ölkənin hüdudlarından kənarda qadın liderliyini önə çəkən mühüm hadisə hesab olunur.