Qəzzada atəşkəsə dair danışıqların Qahirə raundu nəticəsiz başa çatıb
Qəzza zolağında atəşkəs razılaşması üzrə danışıqların Qahirədə keçirilən növbəti raundu nəticəsiz başa çatıb, lakin proses davam edəcək.
The Times of Israel nəşri bu barədə Amerika rəsmisinə istinadla məlumat yayıb. Mənbənin sözlərinə görə, Qahirədəki danışıqlar “konstruktiv olub, yekun və işlək razılaşma əldə edilməsi ruhunda keçirilib və bütün tərəflər bu fikri bölüşüblər”.
Bildirilir ki, qalan məsələlərin və detalların nəzərdən keçirilməsi üçün proses işçi qruplar çərçivəsində yaxın günlərdə davam etdiriləcək.
ABŞ prezidentinin milli təhlükəsizlik müşaviri Ceyk Sallivan Kanadada keçirdiyi mətbuat konfransında Vaşinqtonun Qahirədə Misir və Qətər vasitəçiləri, eləcə də İsrail tərəfi ilə “hələ də qızğın” işlədiyini deyib.
HƏMAS hərəkatının nümayəndə heyəti Misir və Qətər vasitəçiləri ilə görüşdükdən sonra Qahirəni tərk edib. Hərəkatın siyasi bürosunun üzvü İzzət ər-Rişq HƏMAS-ın ABŞ Prezidenti tərəfindən iyulun 2-də irəli sürdüyü atəşkəs planını həyata keçirməyə hazır olduğunu bildirib.
