Bakı, 28 dekabr.
Bu gün Azərbaycanda vəkillərin peşə bayramıdır.
Prezident İlham Əliyevin 2019-cu il dekabrın 25-də imzaladığı Sərəncama əsasən, hər il dekabrın 28-i ölkəmizdə vəkillər üçün peşə bayramı – Vəkil Günü kimi qeyd edilir. Bu tarix yalnız peşə sahiblərinin gündəlik zəhmətinə dəyər vermək deyil, həm də hüquqi dövlətin institusional inkişafında vəkilliyin əhəmiyyətini vurğulamaq baxımından mühüm məna daşıyır.

Azərbaycan Vəkillər Kollegiyası ölkədə bütün vəkilləri birləşdirən, qeyri-dövlət, müstəqil, özünüidarə edən təsisatdır. Kollegiya Azərbaycan SSR dövründə 1980-ci ildə təsdiq edilən Əsasnamə ilə formalaşıb, müstəqillik dövründə isə tam olaraq yenilənib. 2004-cü il noyabrın 3-4-də Bakıda keçirilən təsis yığıncağı ilə yeni Vəkillər Kollegiyası yaradılıb və bu proses ölkəmizdə müasir və müstəqil vəkillik institutunun formalaşmasında ciddi dönüş nöqtəsi olub.

Vəkillər Kollegiyasının əsas missiyası hər bir şəxsin hüquq və azadlıqlarının müdafiəsini təmin etmək, vətəndaşlara peşəkar, keyfiyyətli və vicdanlı hüquqi yardım göstərmək, eyni zamanda vəkillik peşəsinin nüfuzunu qorumaqdan ibarətdir. Bu funksiyalar Azərbaycanın Konstitusiyasında təsbit olunan ədalət mühakiməsi, insan hüquqlarının müdafiəsi və qanunun aliliyi prinsiplərinin gerçəkləşdirilməsində mühüm rol oynayır.

2018-ci ildən etibarən ölkədə aparılan hüquqi islahatlar çərçivəsində vəkillik institutu yeni inkişaf mərhələsinə daxil olub. Xüsusilə, Prezident İlham Əliyevin 22 fevral 2018-ci il tarixli Sərəncamı bu sahənin modernizasiyası baxımından tarixi sənəd hesab edilir. Sərəncamda vətəndaşlara yüksək keyfiyyətli hüquqi yardımın təmin edilməsi, güclü və nüfuzlu vəkillik təsisatının formalaşdırılması dövlət siyasətinin prioritetləri kimi müəyyən olunub.

Bu dövrdə həyata keçirilən tədbirlər nəticəsində vəkillik institutunun maddi-texniki bazası gücləndirilib, dövlət hesabına göstərilən hüquqi yardıma görə ödənişlərin məbləği 3 dəfə artırılıb, regionlarda vəkillik fəaliyyətinin genişləndirilməsi istiqamətində addımlar atılıb, gənc hüquqşünasların vəkilliyə cəlb olunması üçün şərait yaxşılaşdırılıb.

Eyni zamanda, Vəkillər Kollegiyasının üzvlük sayı dinamik şəkildə artıb, yeni nəsil hüquqşünaslar peşəyə inteqrasiya olunub, peşə hazırlığı və etik standartların yüksəldilməsi istiqamətində mütəmadi tədbirlər həyata keçirilib.

Vəkillər Kollegiyası son illərdə şəffaflıq, hesabatlılıq, peşəkarlıq və etik davranış standartlarının möhkəmləndirilməsi istiqamətində sistemli addımlar atıb. İxtisas imtahanlarının müntəzəm keçirilməsi, davamlı təlim proqramları, beynəlxalq təşkilatlarla əməkdaşlıq, regionlarda maarifləndirmə tədbirləri bu sahədə aparılan siyasətin əsas istiqamətləridir.

Həmçinin Kollegiya cəmiyyətin hüquqi maarifləndirilməsi, sosial həssas qrupların müdafiəsi və pulsuz hüquqi yardım təşəbbüsləri ilə də seçilir. Bu fəaliyyət vəkillərin yalnız hüquqi institut kimi deyil, həm də ictimai məsuliyyət daşıyan peşə icması kimi rolunu gücləndirir.

Vəkilliyin institusional inkişafı, cəmiyyətin hüquqi müdafiə mexanizminin səmərəliliyi və hüquq sisteminin ümumi keyfiyyəti ilə birbaşa əlaqəlidir. Müstəqil, peşəkar, nüfuzlu vəkil korpusu ədalət mühakiməsinin ədalətli icrası, insan hüquqlarının müdafiəsi və demokratik idarəçiliyin əsas komponentidir.

Vəkillər Kollegiyasının təşkili və fəaliyyəti “Vəkillər və vəkillik fəaliyyəti haqqında” Qanun və Kollegiyanın Nizamnaməsi ilə tənzimlənir ki, bu da təsisatın hüquqi çərçivəsinin sabit, şəffaf və demokratik prinsiplərə əsaslanmasını təmin edir.