TÜRKPA Beynəlxalq Seçki Müşahidə Missiyası Qırğızıstanın xarici işlər nazirinin müavini ilə görüşüb
Noyabrın 28-də TÜRKPA-nın Hüquq məsələləri və beynəlxalq əlaqələr komissiyasının sədr müavini, Qazaxıstan Respublikası Parlamenti Məclisinin deputatı Abzal Kuspanın rəhbərlik etdiyi TÜRKPA Beynəlxalq Seçki Müşahidə Missiyası Qırğız Respublikasının xarici işlər nazirinin müavini Meder Abakirov ilə görüşüb. Missiyanın tərkibinə Qazaxıstan Respublikası Parlamenti Senatının deputatı Serik Şaydarov və TÜRKPA Baş katibinin müavini Sakı Sadıkov daxil olub.
Missiyanı salamlayan nazir müavini Qırğızıstanın TÜRKPA-nın fəaliyyətinə böyük əhəmiyyət verdiyini qeyd edib, parlamentlərarası əməkdaşlığın inkişafında Assambleyanın rolunu vurğulayıb. O, həmçinin növbədənkənar parlament seçkilərinə hazırlıq və bu çərçivədə Xarici İşlər Nazirliyi tərəfindən həyata keçirilən tədbirlər barədə missiyaya məlumat verib.
Meder Abakirov missiyaya seçki sistemi və seçkilərin idarə edilməsi barədə məlumat verərək, seçki prosesinin şəffaflığını, qabaqcıl və rəqəmsal texnologiyaların tətbiqini, seçkilərə hazırlığın və seçkilərin keçirilməsinin rahat və nizamlı şəkildə təşkil olunduğunu vurğulayıb.
TÜRKPA Beynəlxalq Seçki Müşahidə Missiyasının rəhbəri Abzal Kuspan səmimi qəbula və seçki müşahidəsi üçün yaradılmış şəraitə görə səmimi təşəkkürünü bildirib və seçkilərin keçirilməsində uğurlar arzulayıb.
