Bakı, 19 iyun.

Cari il yanvar-may ayları ərzində 3 tondan çox narkotik vasitə qanunsuz dövriyyədən çıxarılıb.

Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının mətbuat xidmətindən verilən məlumata görə, ümumilikdə müsadirə olunmuş 3 ton 313 kiloqram 859,7 qram narkotik vasitələrin və psixotrop maddələrin 2 ton 905 kiloqram 356,243 qramını marixuana, 188 kiloqram 156,45 qramını heroin, 76 kiloqram 040,847 qramını tiryək, 33 kiloqram 150,438 qramını həşiş, 21 kiloqram 438,927 qramını digər narkotik vasitələr və 89 kiloqram 716,795 qramını psixotrop maddələr təşkil edib.

Həmçinin göstərilən dövr ərzində 5 min 183 ədəd metadon, 8 min 235 ədəd çətənə və 600 qram xaş-xaş bitkisi, eləcə də 32 qram, 95 həb,39 kapsul güclü təsir edən maddə qanunsuz dövriyyədən götürülüb.

Hesabat dövründə Daxili İşlər Nazirliyinin təşkilatçılığı və digər aidiyyəti qurumların nümayəndələrinin iştirakı ilə 97 hektar sahədən 17 min 590 ədəd, 4 ton 94 kiloqram yabanı halda bitən narkotik tərkibli çətənə xaş-xaş bitkiləri müəyyən olunaraq müvafiq qaydada məhv edilib.

Qanunsuz dövriyyədən çıxarılan 3 ton 313 kiloqram 859,7 qram narkotik vasitələrin və psixotrop maddələrin ümumilikdə dəyəri 87 milyon 551 min manat kimi qiymətləndirilir.