Gömrük orqanlarının qanunsuz dövriyyədən çıxardığı 5,1 tondan çox narkotik məhv edilib
Yanvarın 28-də Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupunun təşkilatçılığı və dövlət orqanlarının əməkdaşlarından ibarət komissiya üzvlərinin iştirakı ilə gömrük orqanları tərəfindən həyata keçirilən gömrük nəzarəti və əməliyyat-axtarış tədbirləri nəticəsində qanunsuz dövriyyədən götürülmüş və barəsində məhkəmənin məhvetmə qərarı qəbul edilmiş 24 cinayət işi üzrə ümumilikdə 5 ton 168 kiloqram 332 qram narkotik vasitələr və psixotrop maddələr yandırılaraq məhv edilib.
Bu barədə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupundan məlumat verilib.
Beynəlxalq standartlara və milli qanunvericiliyə uyğun şəkildə şəffaflıq prinsipi əsasında həyata keçirilmiş məhvetmə aksiyasını BMT-nin Narkotiklər və Cinayətkarlıq İdarəsinin, media və ictimai təşkilatların nümayəndələri də izləyiblər.
Məhv edilənlərin 91,3 faizi daha təhlükəli narkotiklər, yəni 4 ton 662 kiloqram 185 qramı heroin və 58 kiloqram 837 qramı metamfetamin olub, bundan əlavə 369 kiloqram 529 qram tiryək, 77 kiloqram 779 qram həşiş və digər maddələr də məhv edilib.
Bu narkotiklərin 98,7 faizi, yəni 17 fakt üzrə 5 ton 105 kiloqram 990 qramı cənub sərhədlərindən Azərbaycan ərazisinə daxil olmaqla tranzit yolla Avropa ölkələrinə çatdırılması üçün nəzərdə tutulurdu. Məhv edilən narkotiklərin Avropada qanunsuz orta pərakəndə satış qiyməti 272 milyon avrodan çox təşkil edir.
