Belqrad Müdafiə Universitetinin nümayəndələri xüsusi təyinatlı təhsil müəssisələrində olublar
ORDU
Belqrad Müdafiə Universitetinin nümayəndələri xüsusi təyinatlı təhsil müəssisələrində olublar
04.04.2025
Bakı, 4 Aprel.
Azərbaycan Respublikasında səfərdə olan Serbiya Respublikasının Belqrad Müdafiə Universitetinin rektorunun beynəlxalq hərbi və universitetlərarası əməkdaşlıq üzrə müavini polkovnik Srdyan Lyuboyeviçin rəhbərlik etdiyi nümayəndə heyəti Milli Müdafiə Universitetində (MMU), Heydər Əliyev adına Hərbi İnstitutda və Cəmşid Naxçıvanski adına Hərbi Liseydə olublar.
Müdafiə Nazirliyinin mətbuat xidmətindən verilən məlumata görə, əvvəlcə MMU-da keçirilən görüşdə universitet rektorunun elm üzrə müavini, Hərbi Elmi Tədqiqat İnstitutunun rektoru general-mayor Arif Həsənov qonaqları ölkəmizdə görməkdən məmnun olduğunu ifadə edib. Azərbaycan və Serbiya arasında hərbi təhsil sahəsində əməkdaşlığın artan xətlə davam etdiyini qeyd edən general-mayor A.Həsənov bu əlaqələrin qarşılıqlı təcrübə mübadiləsində də əks olunduğunu xüsusi vurğulayıb.
Daha sonra nümayəndə heyətinə MMU-nun yaranma tarixi, təhsil sistemi, eləcə də qarşıda duran məqsəd və vəzifələrindən bəhs edən brifinq təqdim olunub. Görüş əsnasında, həmçinin iki ölkə arasında hərbi təhsil sahəsində görülən işlərin cari vəziyyəti və perspektiv məsələləri müzakirə edilib.
Görüş yekunlaşdıqdan sonra Serbiya Respublikasından olan nümayəndə heyəti Azərbaycan Hərb Tarixi Muzeyini ziyarət edib. Burada qonaqlara Azərbaycanın qədim hərb tarixi, döyüş ənənələri, tariximizin müxtəlif dövrlərini özündə əks etdirən hərbi eksponatlar barədə məlumatlar verilib.
Səfərin növbəti günündə Serbiya Respublikasının Belqrad Müdafiə Universitetinin ölkəmizdə olan nümayəndə heyəti Milli Müdafiə Universitetinin Heydər Əliyev adına Hərbi İnstitutu və Cəmşid Naxçıvanski adına Hərbi Liseyində olublar.
Burada qonaqlar Heydər Əliyev Muzeyinə gələrək Ulu Öndərin həyat və siyasi fəaliyyətini əks etdirən fotoguşə ilə tanış olublar.
Daha sonra qonaqlara institutun və liseyin tarixləri, əsas fəaliyyət istiqamətləri və qarşıda duran vəzifələri haqqında hazırlanmış brifinqlər təqdim olunub. Brifinqlər başa çatdıqdan sonra qarşılıqlı maraq doğuran suallar cavablandırılıb.
