Birgə məlumat: Tovuz rayon Vəkil Bürosunun müdiri və vəkili barəsində cinayət işi başlanıb
CƏMİYYƏT
Birgə məlumat: Tovuz rayon Vəkil Bürosunun müdiri və vəkili barəsində cinayət işi başlanıb
28.08.2024 [16:48]
Birgə məlumat: Tovuz rayon Vəkil Bürosunun müdiri və vəkili barəsində cinayət işi başlanıb
Bakı, 28 avqust.
Tovuz rayon Vəkil Bürosunun müdiri Rəşad Tapdıq oğlu Abdullayev və həmin qurumun vəkili Süleyman Hüseynqulu oğlu Əliyevin qanunsuz əməlləri barədə daxil olmuş məlumat əsasında keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddəsi ilə cinayət işi başlanıb.
Baş Prokurorluq ilə Vəkillər Kollegiyası birgə məlumat yayıb.
Birgə məlumatda bildirilib ki, əməliyyat-istintaq tədbirləri nəticəsində Rəşad Abdullayevin 2023-2024-cü illər ərzində ayrı-ayrı hallarda birbaşa və Süleyman Əliyevlə qabaqcadan əlbir olmaqla məhkəmənin icraatında olan müxtəlif cinayət və mülki işlər üzrə öz həqiqi və ya güman edilən təsir imkanlarından istifadə edərək müvafiq vəzifəli şəxslərin qərarına qanunsuz təsir etmək imkanında olmasını vətəndaşlara bildirməklə müxtəlif məbləğlərdə müqavilədən kənar pul vəsaiti tələb etməsinə və almasına əsaslı şübhələr müəyyən edilib.
İş üzrə toplanmış sübutlar əsasında Rəşad Abdullayev və Süleyman Əliyev Cinayət Məcəlləsinin 312-1.1-ci (vəzifəli şəxsin qərarına qanunsuz təsir göstərmə - nüfuz alveri) maddəsi ilə təqsirləndirilən şəxs qismində cəlb edilərək barələrində polisin nəzarəti altına vermə qətimkan tədbiri seçilib.
Həmçinin Vəkillər Kollegiyası tərəfindən həmin şəxslər barəsində qanunvericilikdə nəzərdə tutulmuş qaydada araşdırma aparılır.
Hazırda cinayət işi üzrə əhəmiyyət kəsb edən halların, cinayətlərin törədilməsində hər hansı formada iştirak etmiş digər şəxslərin müəyyənləşdirilməsi istiqamətində əməliyyat-istintaq tədbirlərinin həyata keçirilməsi davam etdirilir.
