Ankarada türk dövlətlərinin Vəkillər kollegiyaları birliyinin yaradılması ilə bağlı bəyannamə imzalanıb
Vəkillər Kollegiyasından bildirilib ki, görüşün məqsədi Türk dünyası Vəkillər kollegiyalarının rəhbərləri arasında fikir mübadiləsi aparmaq və mümkün əməkdaşlığın qiymətləndirilməsi, qurulması yollarının müzakirə edilməsindən ibarət olub.
Tədbirdə çıxış edən TBB-nin başqanı Erinç Sağkan görüşün əhəmiyyəti barədə məlumat verib. O qanunun aliliyinin təmin edilməsinin önəmini qeyd edərək vətəndaşların hüquqlarının qorunmasına mühüm töhfə verən hüquq sahəsində sıx dialoqdan bəhs edib.
Azərbaycan Vəkillər Kollegiyasının sədri Anar Bağırov çıxışında Türk dünyası Vəkillər kollegiyalarının vəkilləri arasında sıx əməkdaşlığın, təcrübə mübadiləsinin, vəkillər üçün beynəlxalq təlimlərin, konfransların keçirilməsinin vacibliyindən danışıb.
Azərbaycan və Türkiyə dostluğundan, qardaşlığından danışan sədr toplantını tarixi gün adlandırıb. A.Bağırov çıxışının davamında türk dövlətlərinin vəkillərinin əməkdaşlığı üzrə yeni təşkilatın yaradılmasına ümidvar olduğunu bildirib və bütün vəkilləri həmin təşəbbüsü dəstəkləməyə çağırıb.
Mərasimdə çıxış edən Qazaxıstan Milli Vəkillər Kollegiyasının sədri Aidyn Bikebayev, Qırğızıstan Vəkillər Şurasının sədri Meyil Begilerova, Şimali Kipr Türk Cümhuriyyətinin Vəkillər Kollegiyasının sədri Hasan Esendağlı, Özbəkistan Vəkillər Kollegiyasının sədri Shulhrat Sadikov və Türkmənistanın Aşqabad Vəkillər Kollegiyasının sədri Gunça Garajayeva görüşün əhəmiyyətindən danışıblar.
Mərasimdə Türk dünyası Vəkillər kollegiyalarının rəhbərləri niyyət bəyannaməsi imzalayıb. Bəyannamədə Türk dövlətlərinin Vəkillər Kollegiyaları birliyinin yaradılması, nizamnaməsinin hazırlanması, o cümlədən növbəti mərhələlərdə zirvə görüşlərinin keçirilməsi nəzərdə tutulub.
Qeyd edək ki, görüş çərçivəsində ARVK-nın sədri Anar Bağırov TBB-nin prezidenti Erinç Sağkanı “Azərbaycan vəkilliyinin 100 illiyi” yubiley döş nişanı ilə təltif edib.
