Heç kimə sirr deyil ki, bəzi Qərb dövlətləri və institutları zaman-zaman müstəqil siyasət yürüdən ölkələri hədəfə alıblar. Bu sırada Amerika Birləşmiş Ştatları xüsusilə “fərqlənir”. Ona görə “fərqlənir” deyirik ki, bu, xoş niyyətə deyil, qara planlara xidmət edən fərqlənmədir.

Bu sözləri Milli Məclisin deputatı Vüqar İskəndərov deyib.

Deputat qeyd edib ki, okeanın o tayında oturub bütün dünyanı öz iradəsinə tabe etmək istəyənlər müstəqil siyasət həyata keçirən ölkələrə qarşı təzyiq zamanı Beynəlxalq İnkişaf Agentliyi (USAID) kimi təşkilatlardan istifadə edirlər: “Biz çox da uzaq olmayan tarixə nəzər salsaq görərik ki, harada ABŞ-ın “bir sözünü iki edən” ölkələr varsa orada müxtəlif təşkilatların, xüsusilə də USAID-in qara kölgəsi peyda olur. Bu cür çirkli, təzyiq məqsədli işlərdə USAID-in bir qədər daha qabarıq önə çıxması isə heç də təsadüfi deyil. Çünki USAID Dövlət Departamentinə bağlı bir təşkilatdır. Bu təşkilatın aparıcı üzvlərinin bir çoxu ABŞ kəşfiyyatının əməkdaşlarıdır. Yəni, Ağ Ev öz sözünü, öz məqsədini USAID-in dili ilə qarşı tərəfə çatdırır. Eyni zamanda, müstəqil ölkələrə qarşı, belə deyək, qurşaqdan aşağı zərbəni də məhz bu tipli təşkilatlar vasitəsilə vurur”.



V.İskəndərovun sözlərinə görə, USAID-in fəaliyyətinin əsas istiqamətlərindən biri də həmin müstəqil siyasət yürüdən ölkələrdə “beşinci kolon”lar formalaşdırmaq və onları maliyyələşdirməkdir: “Müxtəlif istiqamətli, müxtəlif adlar altında yaradılan bu tip təşkilatlar ümumi məqsədə xidmət edir. Bu da amerikalıların təbirincə yanaşsaq “sözə baxmayan” ölkələri ram etmək üçün onlara daxildən təzyiqlər etmək məqsədidir. Biz bunu Azərbaycana yanaşmada da bütün çılpaqlığı ilə hiss edirik. Məlum olur ki, ABŞ-ın bəlli təşkilatları, o cümlədən USAID “beşinci kolon” təmsilçilərini cəmiyyətin müxtəlif təbəqələri arasında yetişdirmək üçün dəridən-qabıqdan çıxıb, onları bəsləmək üçün müxtəlif qanunsuzluqlara, cinayətlərə baş vurub. Lakin Azərbaycan dövlətinin müvafiq qurumlarının ayıq-sayıqlığı bu qanunsuzluqların vaxtında aşkar edilməsi, cinayətlərin faş olması ilə nəticələnir. Hesab edirəm ki, bu baş verənlər okeanın o tayındakılarına yaxşıca dərs olmalıdır. Onlar belə əməllərdən əl çəkməlidirlər. Eyni zamanda, bilməlidirlər ki, Azərbaycanı müstəqil siyasətindən heç bir qüvvə döndərə bilməz. Bu siyasətin mərkəzində xalq-prezident birliyi dayanır”.