Qaxda bir sinfin bütün məzunları tələbə adını qazanıb
Qax şəhər Namiq Allahverdiyev adına 2 nömrəli məktəb-liseyin XIA sinif şagirdləri rayon üzrə rekord nəticə göstərib - 19 məzunun hamısı yüksək balla ali məktəblərə qəbul olunub.
2 nömrəli məktəb 1979-cu ildən fəaliyyət göstərir. Rayonda müxtəlif xalqların nümayəndələri yaşadığından bu təhsil ocağında da onların fəaliyyəti, təhsil alması üçün bütün imkan və şərait yaradılıb. Belə ki, burada üç dildə - Azərbaycan, rus və gürcü dillərində tədris aparılır. Diqqəti cəlb edən məqam budur ki, ölkədə ən tolerant və multukultural təhsil ocaqlarından olan 2 nömrəli məktəb bütün dövrlərdə şagird və müəllimlərinin uğurları ilə seçilib. Bu il isə məktəbin XIA sinif şagirdlərinin hamısı ali məktəblərə qəbul olunub.
Birinci və İkinci Qarabağ müharibəsi günlərində bu məktəbin onlarla yetirməsi döyüşlərə qatılıb. Təhsil ocağı Birinci Qarabağ müharibəsi şəhidi Namiq Allahverdiyevin adını daşıyır. Məktəb-valideyn komitəsinə sədrliyi şəhid Namiq Allahverdiyevin qardaşı Natiq Allahverdiyevin həyata keçirməsi heç də təsadüfi deyil. Çünki Allahverdiyevlər ailəsinin bu təhsil ocağı ilə bir çox mənəvi bağlılığı var.
“Bu məktəbin uğurlarına çox sevinirəm. Çünki məktəb şəhid qardaşım Namiq Allahverdiyevin adını daşıyır. Özüm bu məktəbin məzunu olmuşam. Qardaşlarım buranı bitiriblər. Övladlarımdan ikisi buradan məzun olub, biri isə hazırda oxuyur. Qardaşımın adını daşıdığı övladı da burada oxuyur, ona görə də bu məktəbin hər bir uğuru mənim üçün çox doğmadır, əzizdir”, - deyən Natiq Allahverdiyev məzunları, onların valideyn və müəllimlərini əldə olunan uğur münasibətilə təbrik edir.
Hazırda bu təhsil ocağında 931 şagird təhsil alır. Məktəb direktoru Aybəniz Məmmədova bildirir ki, gürcü sektorunu bu il bitirən daha 8 məzun da qonşu ölkənin ali məktəblərinə daxil olub.
“Həmişə öz uğurlu nəticələri ilə fərqlənən məktəbimiz ənənələrinə sadiq qalaraq bu il daha böyük nəticəyə imza atıb. Ali məktəblərə qəbul zamanı məzunlarımız 600-dən yuxarı bal toplayıb və respublikanın müxtəlif universitetlərinə qəbul olunublar. Bu uğurun ən möhtəşəmi isə məktəbimizin XIA sinfini bitirən 19 məzunun hər birinin ali məktəblərə qəbul olunmasıdır. Yəni, bu sinfi bitirən uşaqların hamısı ali məktəblərə sənəd verib və qəbul olunublar”, - deyə sevincini bölüşən məktəb direktoru onu da söyləyir ki, 2 nömrəli məktəb ötən ildən həm də STEAM təhsil sisteminə keçib.
