Bildiyimiz kimi, 2024-cü il “Yaşıl dünya naminə həmrəylik ili” elan olunub. Bununla əlaqədar olaraq Bakı Dövlət Universitetinin Biologiya fakültəsi tərəfindən bir neçə istiqamətdə tədbirlər planı hazırlanmışdır. Bu plan üzrə olan tədbirlərdən biri ətraf mühitin qorunmasına dair ekskursiyaların təşkil olunmasıdır. Bakı Dövlət Universiteti (BDU) Biologiya fakültəsinin Biologiya müəllimliyi ixtisası üzrə təhsil alan 157A, 158A və 159A qruplarının tələbələri, BDU-nun Biologiya fakültəsinin əməkdaşları Könül Hacıyeva və Səma Əhmədlinin rəhbərliyi ilə “Yaşıl dünya naminə həmrəylik ili” proqramı çərçivəsində olan tədbirdə iştirak etmişdirlər.
Tədbir proqramının əsas məqsədi tələbələrə parklarda, xüsusi mühafizə olunan ərazilərdə qorunan heyvan və bitki növləri, suyun, havanın təmiz olmasının vacibliyi, ekoloji çirklənmənin qarışısının alınması yolları, bitki və heyvan növlərinin sayının artırılması haqqında məlumat verməkdir.
Tədbir proqramı çərçivəsində Ekologiya nazirliyinin” Şahdağ Milli Parkı” Şamaxı bölməsinin əməkdaşları mühafizə üzrə direktor müavini Fərhad Cəlilov və elmi işçi Orxan İbrahimovun dəstəyi ilə “Şahdağ milli parkı”na ekskursiya təşkil olunub. Orxan İbrahimov tələbələrə parkda qorunub saxlanılan heyvan və bitki növləri haqqında geniş məlumat verib. Bundan sonra bu mövzuda tələbələri maraqlandıran suallara cavab verib. Diskussiya bitdikdən sonra isə tələbələr Milli Parkın ərazisinə gəzintiyə yollanıblar. Park ərazisində nəsli kəsilmək təhlükəsi olan və nadir rast gəlinən bir çox bitki və heyvan növləri qorunur. Buna misal olaraq heyvan növlərindən qonur ayı, maral, yenot, vaşaq, quş növlərindən qırqovul, bildirçin və bir neçə növlər mövcuddur. Bitki növlərinin bir çoxu isə park ərazisində yerləşən Qaracöhrə meşəsində mövcuddur. Tələbələr Qaraçöhrə meşəsində palıd, vələs, fıstıq, ağcaqayın, qaraçöhrə, yemişan, zirinc və s. bitki növlərini müşahidə ediblər.
Daha sonra isə tələbələr ekskursiyanın davamını” Şahdağ milli parkı”nın Şamaxı rayonu ərazisində yerləşən “Safari parkı”nda davam etdiriblər. Park ərazisində Altay maralı, bizon, zubr, alpaka lama, xallı maral və digər heyvan növlərinə rast gəlinir. Bu heyvan növlərinin qorunub, saxlanılması üçün isə ekoloji təmizliyə və bununla yanaşı ərazidə bitki növlərinin sayının artırılmasına diqqət yetirmək lazımdır.
Təbiətin qorunması və ekologiyanın rifahı üçün “YAŞIL DÜNYA NAMİNƏ HƏMRƏY OLAQ!”