Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin (SXA) Əlilliyi olan şəxslərin Peşə-əmək Reabilitasiyası Mərkəzinin beş yetirməsinə təhsil proqramı və kompüterlər hədiyyə edilib.
Agentliyin İctimaiyyətlə əlaqələr və kommunikasiya şöbəsindən verilən məlumata görə, təhsil proqramını əlilliyi olan şəxslərə "Skillwill" neoakademiyası tərəfindən təqdim olunub və informasiya texnologiyaları sahəsində 7 aylıq tədris dövrünü əhatə edir.
Mərkəzin yetirmələrinin həmin proqramda fəal iştirakına dəstək olmaq məqsədilə verilən kompüterləri "Art Council Azerbaijan", "BestComp" və Sosial Xidmətlər Agentliyi təmin edib.
Agentliyin İdarə Heyətinin sədri Vüqar Behbudov gənclərlə görüşərək onlara gələcək fəaliyyətlərində uğurlar arzu edib.
Qeyd edilib ki, Əlilliyi olan şəxslərin Peşə-Əmək Reabilitasiya Mərkəzində bu il 200-dən çox gəncə peşə və sosial reabilitasiya xidmətləri göstərilib.
Gənclər burada kompüter istifadəçisi, dərzi, bərbər, toxuculuq və sair peşə hazırlığı kurslarına cəlb olunublar.
Hazırda Mərkəzdə 130-dan çox şəxsin peşə və sosial reabilitasiya kursu davam edir.