Bakı, 25 sentyabr.
COP29 kimi mötəbər tədbirin Azərbaycanda keçirilməsi dövlətinizin bu sahəyə verdiyi dəyərin bariz nümunəsidir. Həmçinin Prezident İlham Əliyev öz çıxışlarında dəfələrlə enerji təhlükəsizliyinin vacibliyinə diqqət çəkib. Enerji isə Böyük Britaniya ilə Azərbaycan arasındakı münasibətlərdə əsas amildir.
Bu sözləri Böyük Britaniya Parlamentinin sabiq deputatı David Duguid 1-ci Azərbaycan-Birləşmiş Krallıq Siyasət Dialoqunun açılış mərasimində deyib.
O qeyd edib ki, Azərbaycan son illərdə enerji siyasətində bərpaolunan mənbələrə xüsusi önəm verir. Günəş və külək enerjisi layihələrinin inkişafı, Qarabağ və Şərqi Zəngəzurun “yaşıl enerji zonası” elan edilməsi bu istiqamətdə mühüm addımlardır. “Məqsəd ölkənin enerji təhlükəsizliyini gücləndirməklə yanaşı, iqtisadiyyatın şaxələndirilməsinə və ekoloji davamlılığa nail olmaqdır. Azərbaycan həmçinin beynəlxalq əməkdaşlıq çərçivəsində yaşıl enerjinin inkişafını dəstəkləyir və qlobal iqlim gündəliyinə töhfə verməyə çalışır”, - deyə David Duguid əlavə edib.