Yola saldığımız 2023-cü ildə qazandığımız böyük uğurlar, ilk növbədə, Ümummilli Lider Heydər Əliyevin adı ilə bağlıdır. Çünki cari ildə və ümumiyyətlə, son 20 ildə məhz Ulu Öndərin tərəfindən başladılan, amma axıra çatdırılmayan planlar məhz Prezident İlham Əliyev tərəfindən reallaşdırıldı.
Bunu Milli Məclisin deputatı Sahib Alıyev parlamentin dekabrın 30-da keçirilən iclasında deyib.
Deputat diqqətə çatdırıb ki, 4 il bundan əvvəl Soçidə keçirilən “Valday” forumunda dövlətimizin başçısının çıxışı müstəqil Azərbaycanın qurucusu Heydər Əliyev siyasətinə sadiqliyin təzahürü idi.
“Valday” forumunda bəzilərinin heç də ürəyindən olmayan “Qarabağ Azərbaycandır və nida” ifadəsi Heydər Əliyev siyasətinə sadiqliyin, onunla eyni genin, eyni qətiyyətin daşıyıcılığının sərgilənməsi idi. Bir il sonra həmin forumdakıların da, digərlərinin də diqqətinə Qarabağın doğrudan da Azərbaycanın olduğu bir daha çatdırıldı. Nida isə məhz bu il - 2023-cü ildə qoyuldu. Qarabağ tam Azərbaycanlaşdı. Qırx dörd günlük savaş zamanı olduğu kimi, bu il də yenə biz presedent yaratdıq. Hibrid savaşı dönəmində Azərbaycan ilk ölkə oldu ki, öz ərazi bütövlüyünü və torpaqları üzərində tam suverenliyini “ağıllı güc”, yəni, yumşaq güclə sərt gücün sinxronlaşdırılaraq tətbiqi nəticəsində əldə etdi.
Vətəndaş cəmiyyəti təmsilçilərinin Laçın yolundakı aksiyasının əhəmiyyətini qeyd edən deputat bunu yumşaq gücün təzahürü kimi qiymətləndirib.
Onun sözlərinə görə, “ağıllı güc” tətbiq etməklə Azərbaycanın son 3 ildə atdığı bütün addımlar mahiyyətcə məhz sülhə məcburetmə məqsədi daşıyır. Özü də bu sülhə məcburetmənin hədəfi təkcə Ermənistan yox, həm də regionda qarşıdurmanın qalmasına çalışan bəzi irticaçı qüvvələrdir.
“Ermənistanın hətta digər dövlətləri də COP29-un Bakıda keçirilməsi təşəbbüsünü dəstəkləməyə çağırması Prezident İlham Əliyevin son 3 ildə diplomatik müstəvidə həmin “yırtıcılar”a qarşı yürütdüyü sülhəməcburetmə siyasətinin təntənəsi idi”, - deyən deputat vurğulayıb ki, biz torpaqlarımız üzərində suverenliyimizi tam edəndən sonra ermənilərə Azərbaycanı təkləyərək Serbiyaya, uydurma “Artsax”ı isə Kosovoya çevirəcəklərini bildirənlər həmin Ermənistanın əli ilə necə ustalıqla fakt qarşısında qoyuldular.
“2024-cü ildə Azərbaycanda İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası keçiriləcək, "Heydər Əliyev İli” isə “Yaşıl dünya naminə həmrəylik ili” ilə əvəzlənir. Əminəm ki, Ulu Öndərin ruhu şaddır”, - deyə Sahib Alıyev vurğulayıb.