NATO-nun Baş katibinin regiona səfərinin Azərbaycandan başlaması ölkəmizin Alyans üçün önəmini nümayiş etdirir
SİYASƏT
NATO-nun Baş katibinin regiona səfərinin Azərbaycandan başlaması ölkəmizin Alyans üçün önəmini nümayiş etdirir.
NATO-nun Baş katibi Yens Stoltenberqin Azərbaycana səfəri, Prezident İlham Əliyevin isə NATO-nun mənzil-qərargahında yeddi dəfə olması iki tərəf arasında əməkdaşlığın yüksək dinamizmini göstərir. NATO-nun Baş katibinin regiona səfərinin Azərbaycandan başlaması ölkəmizin Alyans üçün nə dərəcədə önəmli tərəfdaş olduğunu bir daha nümayiş etdirir. Azərbaycan NATO ilə əməkdaşlığı Cənubi Qafqaz regionunda yerləşən bəzi ölkələrdən fərqli olaraq, bu təşkilata birbaşa inteqrasiya etmədən və ya üzvlük məsələsini əsas hədəf kimi qoymadan xüsusi formatda inkişaf etdirib. Belə ki, Azərbaycan NATO üzvü olan ölkələrlə ikitərəfli əlaqələri inkişaf etdirmək prinsipinə daha çox üstünlük verib. Nəticə etibarilə Azərbaycan NATO üzvü olan ölkələrin təxminən üçdəbiri ilə strateji tərəfdaşlıq münasibətləri qurub.
Bu fikirləri açıqlamasında Beynəlxalq Münasibətlərin Təhlili Mərkəzinin (BMTM) eksperti Nağı Əhmədov səsləndirib.
Bu aspektdə Azərbaycanın Türkiyə ilə əlaqələrinin inkişafını xüsusi vurğulayan ekspert deyib: “Azərbaycan Alyansa üzv olmadan NATO standartlarına uyğun ordu quruculuğuna böyük ölçüdə nail olmuş nadir ölkə kimi qiymətləndirilə bilər. Çünki Azərbaycan uzun müddətdir ki, ordu quruculuğunda NATO standartlarını tətbiq edir. Bu məsələdə Türkiyənin və NATO-nun üzvü olan digər ölkələrin təcrübəsindən geniş istifadə edilib. Bundan əlavə, Azərbaycan həm Kosovoda, həm də Əfqanıstanda NATO-nun sülhməramlı missiyasında uğurla iştirak edərək etibarlı tərəfdaş olduğunu sübuta yetirib. Əfqanıstandakı “Qətiyyətli dəstək” əməliyyatlarında Azərbaycanın birbaşa hərbçi heyəti ilə iştirakı, eyni zamanda, əməliyyatlar zamanı ölkəmizin beynəlxalq təhlükəsizliyə töhfə vermək məqsədilə öz hava məkanını NATO müttəfiqlərinə açması ikitərəfli əməkdaşlığın möhkəmlənməsində mühüm rol oynayıb. Bundan başqa, NATO ilə Azərbaycan arasında əməkdaşlığın digər bir vacib elementi nəqliyyat bağlantılarıdır. Belə ki, son dövrlər Avrasiya məkanında gedən geosiyasi prosesləri nəzərə alsaq, Azərbaycan ərazisindən keçən Orta Dəhliz NATO müttəfiqlərinin iqtisadi təhlükəsizliyinin təmin olunmasında xüsusilə vacib əhəmiyyət daşıyır. Bundan əlavə, Azərbaycanla NATO arasında əməkdaşlığın əsasını məhz enerji təhlükəsizliyi məsələsi təşkil edir”.
Azərbaycanla NATO arasında əməkdaşlığın tarixinə də toxunan ekspert bunun ölkəmizin yenicə müstəqillik əldə etdiyi dövrə təsadüf etdiyini vurğulayaraq bildirib: “1994-cü ildə Azərbaycanla NATO arasında Sülh Naminə Tərəfdaşlıq barədə çərçivə sənədinin imzalanması ilə tərəflər arasında məzmunlu tərəfdaşlığın əsası qoyulub. NATO ilə Azərbaycan arasında əməkdaşlığın çox geniş spektri mövcuddur. Buraya hərbi təlim və təhsil sahəsində əməkdaşlıq, eyni zamanda, Azərbaycanın müdafiə və təhlükəsizliklə bağlı həyata keçirdiyi islahatlar, həmçinin Müdafiə Nazirliyinin və digər qurumların strateji sənədlərinin hazırlanmasında şəxsi heyətin idarə olunmasında və digər məsələlərdə NATO təcrübəsi Azərbaycan tərəfindən həmişə öyrənilib”.
