Ermənistan və Fransa ötən ilin oktyabrında hərbi sahədə əməkdaşlıq haqqında saziş imzalayıb. Bu müqaviləyə əsasən, Paris İrəvanı radarlar və raketlərlə təmin etməli, ordu islahatları ilə bağlı məsləhətlər verməli idi. Bu strategiyanın fəal şəkildə həyata keçirilməsi isə 2023-cü ilin aprelində Fransanın xarici işlər naziri Katrin Kalonnanın Ermənistana səfərindən sonra baş verdi. Attaşenin təyin olunması isə elə həmin səfər zamanı elan olundu. Bundan sonra isə rəsmi İrəvanın və Parisin müdafiə sahəsində əməkdaşlığına uyğun olaraq Ermənistana zirehli texnika və silah tədarükü başladı. Belə ki, 2023-cü ilin son aylarında Fransa Ermənistana “Bastion” tipli texnikaların ilk partiyasını göndərdi. Göndərilməsi planlaşdırılan digər silah təchizatına isə 250 kilometr məsafədə düşmən təyyarələrini aşkar etməyə imkan verən üç ədəd “Ground Master” radarı - GM 200, gecəgörmə cihazları, həmçinin “VAB MK 3” zirehli transportyorları daxildir. Bu, Azərbaycan-Ermənistan sülh danışıqları fonunda Fransanın bölgədəki vəziyyəti qəsdən gərginləşdirmək cəhdi idi.
Bu sözləri Mətbuat Şurasının İdarə Heyətinin üzvü, politoloq Yeganə Hacıyeva söyləyib.
Politoloq bildirib ki, Fransa ilə Ermənistan arasında imzalanan müdafiə sahəsində əməkdaşlıq sazişində Fransa ordusunun bu il erməni hərbçiləri üçün “hərbi dağ alpinizmi” adı altında döyüş hazırlığı kursu keçirməsi nəzərdə də tutulur. Beləliklə, rəsmi Paris təcavüzkar Ermənistanı müasir silahlarla təmin etməklə sülh prosesinə zərbə vurmağa və regionda gərginliyin artmasına səy göstərir. Fransa Cənubi Qafqazda fəal şəkildə genişlənmək üçün Ermənistanla müdafiə sahəsində əməkdaşlığın hüquqi bazasını formalaşdırmağa çalışır.
“Fransanın bu “canfəşanlığı” Parisin Ermənistanın hərbi arsenalını genişləndirmək istiqamətindəki ilk addımı deyil. Fransa həm ATƏT-in Minsk qrupunun həmsədri olduğu müddətdə, həm 44 günlük Vətən müharibəsi dövründə, eləcə də ondan sonra Ermənistan ordusuna Azərbaycanın əsgərinə və vətəndaşlarına tuşlanmış silahların verilməsində iştirak edib. İkinci Qarabağ müharibəsinə qədər bu iki ölkə arasında münasibətlərin hərbi-siyasi ölçüsünü tam əhatə edəcək hərtərəfli strateji saziş və ya müqavilə mövcud deyil. Hazırda isə Fransa Ermənistanla müdafiə sahəsində əməkdaşlığın inkişafını üç istiqamətdə - ikitərəfli, Avropa İttifaqı (Aİ) missiyası və NATO çərçivəsində davam etdirmək üçün hüquqi baza formalaşdırır. Ötən iki il ərzində ölkələr arasında rəsmi razılaşmalara görə, Fransa Ermənistana hava hücumundan müdafiə, hərbi alpinizm, sülhməramlı və Aİ-nin missiyası çərçivəsində hərbi yardımlar göstərir”, - deyə Y.Hacıyeva vurğulayıb.