Apellyasiya Arbitraj Tribunalının 2023-cü il ərzində fəaliyyətinin yekunlarına həsr olunmuş iclası keçirilib.
İclasda əvvəlcə Azərbaycan Respublikasının Dövlət Himni səsləndirilib, ölkəmizin ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad olunub.
Apellyasiya Arbitraj Tribunalının sədri Nazim Rəşidov qurumun il ərzindəki fəaliyyəti barədə hesabat məruzəsi ilə çıxış edib. Qeyd olunub ki, Tribunal yeni tərkibdə fəaliyyətə başladığı ötən dövrdə qarşıya qoyulmuş bütün vəzifələri icra edib, baxılan çoxsaylı işlər üzrə bərabərlik, çəkişmə və ədalətli baxış prinsiplərini gözləyib, hər kəsin müstəqil və qərəzsiz tribunal hüququnun təmin edib, operativ şəkildə qərarlar qəbul edib.
Tribunalın “Heydər Əliyev İli”ndə yeni tərkibdə fəaliyyətə başladığını vurğulayan N.Rəşidov bildirib ki, Ümummilli Liderin “İdman insanları həm fiziki, həm də mənəvi cəhətdən yüksəldən bir vasitədir” fikirləri dövlətimizin müasir dövrdəki uğurlu idman siyasətinin formalaşmasında və inkişafında müstəsna əhəmiyyətə malik olub. Prezident İlham Əliyevin idmanın həyatımızın tərkib hissəsi olması barədə fikrini əldə rəhbər tutan Tribunal qəbul etdiyi obyektiv, ədalətli və humanist dəyərlərə söykənən qərarlarla bu sahənin inkişafına töhfə verməyə çalışıb.
N.Rəşidov qeyd edib ki, Prezident İlham Əliyevin və birinci xanım Mehriban Əliyevanın dekabrın 21-də Xankəndi stadionunda futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları arasında keçirilən oyuna baxmaları və dövlətimizin başçısının oyundan əvvəl çıxışı hər bir azərbaycanlıya qürur hissi yaşadıb.
O, qurumun müstəqil, səmərəli və şəffaf fəaliyyətinə görə AFFA rəhbərliyinə, habelə Tribunalın üzvlərinin təmsil etdikləri qurumların rəhbərlərinə minnətdarlığını bildirib. Qeyd edib ki, Apellyasiya Arbitraj Tribunalı bundan sonra da fəaliyyətini Azərbaycan Respublikasının qanunvericiliyinin, eyni zamanda, FIFA və UEFA-nın normativ tələblərini nəzərə almaqla, AFFA tərəfindən müəyyən olunan norma və qaydalar əsasında səmərəli təşkil edəcək, göstərilmiş etimadı daim doğrultmağa çalışacaq.
Tribunalın üzvləri çıxış edərək gündəlikdə duran məsələ ilə bağlı fikirlərini bölüşüblər. Çıxışlarda Tribunalın növbəti ildə fəaliyyətinin daha səmərəli təşkili üçün müvafiq təkliflər irəli sürülüb, müxtəlif məsələlər müzakirə olunub.
Xatırladaq ki, Tribunalın yeni tərkibi (sədri Nazim Rəşidov – Azərbaycan Respublikası Baş Prokurorluğunun nümayəndəsi; digər üzvlər: Rüfət Kərimov – Baş Prokuror yanında Korrupsiyaya Qarşı Mübarizə Baş İdarəsinin nümayəndəsi, Arif Əyyubov – Vəkillər Kollegiyasının üzvü, Orxan Məmmədov – Dövlət Vergi Xidmətinin nümayəndəsi, Rəşad Qasımov – fərdi sahibkar, Cavid Quliyev – Dövlət Təhlükəsizlik Xidmətinin nümayəndəsi) AFFA İcraiyyə Komitəsinin 2023-cü il 7 mart tarixli qərarı ilə təsdiq olunaraq fəaliyyətə başlayıb.
Çıxışlardan sonra Tribunal bir neçə şikayətə baxaraq qərarlar qəbul edib.
AFFA U-13 Liqasında çıxış edən “Baku Sportinq” klubunun apellyasiya şikayəti təmin edilməyib. Komandanın heyətində yer alan doqquz nömrəli futbolçu Roman Bayandurov adından lisenziyası olmayan Əli Hüseynov adlı şəxs mötərizədə qeyd edilən oyunlarda (I tur “Baku Sporting” – “Zirə” PFK (2:1), II tur “Modern FC” – “Baku Sporting” (1:5), III tur “Baku Sporting” – “Fənər Bakı” (8:1), IV tur EFA – “Baku Sporting” (2:4), V tur “Baku Sporting” - ROFM (0:0), VI tur “Zəngəzur” FK – “Baku Sporting” (2:1), VII tur “Baku Sporting” – “Xəzər Baku” (5:0), VIII tur “Neftçi” PFK – “Baku Sporting” (2:2), IX tur “Baku Sporting” – “Xəzri Buzovna” (6:1)) iştirak etdiyinə görə kluba həmin matçlarda 0:3 hesablı texniki məğlubiyyət verilməsi barədə İntizam Komitəsinin qərarı qüvvədə saxlanılıb.
AFFA U-17 Qızlar Liqasında mübarizə aparan “Baku Sportinq” klubunun şikayəti isə qismən təmin edilib. “Sumqayıt”la oyunun 41-ci dəqiqəsində hakimi təhqir etdiyinə görə birbaşa qırmızı vərəqə aldığı üçün 5 oyun cəzalanan “Baku Sportinq”in baş məşqçisi Aliyə Vəliyeva ilə bağlı İntizam Komitəsinin qərarı dəyişdirilib. Təyin olunan cəzanın bir hissəsi icra edilərək sonuncunun müvafiq liqada 1 oyun buraxması, digər 4 matçlıq cəzasının isə ödənilməsi nəzərə alınaraq, yerdə qalan 4 oyun cəza şərti tətbiq edilib. Şərti cəzanın tətbiqi üçün 3 ay sınaq müddəti təyin olunub. Sınaq müddətinin başlanğıcı ilkin cəzanın çəkildiyi 24 dekabr tarixindən müəyyənləşdirilib. İntizam Komitəsinin qərarı qalan hissədə qüvvədə saxlanılıb.
Tural Bayramlının nümayəndəsi Elcan Həsənli tərəfindən verilən apellyasiya şikayəti də qismən təmin edilib. “Səbail” klubuna qarşı “kompensasiya” tələbinə dair” iş üzrə Oyunçuların Statusu və Transferi Komitəsi tərəfindən qəbul olunmuş əvvəlki qərar ləğv edilib. Bakı klubundan iddiaçı T.Bayramlının xeyrinə ikinciyə dəymiş zərərin əvəzi olaraq 70 000 manat məbləğində pul tutulub. Apellyasiya şikayəti qalan hissədə təmin edilməyib.
Maraqlı tərəflər Apellyasiya Arbitraj Tribunalının qərarından Lozannadakı (İsveçrə) İdman üzrə Arbitraj Məhkəməsinə (CAS) şikayət verə bilərlər. Qərarın tam mətni 30 gün ərzində hazırlanaraq tərəflərə göndəriləcək.