2020-ci ildə 44 günlük Vətən Müharibəsi təkcə Azərbaycanın deyil, bütün regionun tarixində dönüş nöqtəsi oldu. Qalib Ali Baş Komandan Prezident İlham Əliyevin rəhbərliyi ilə bu ilin sentyabrında həyata keçirilən lokal xarakterli antiterror tədbirləri nəhayət Qarabağ separatizmi probleminə son qoyuldu və Cənubi Qafqazın sülh və inkişaf yolunu açdı. Ümummilli lider Heydər Əliyev hər zaman deyirdi ki, “Sülh danışıqlarını cəsarətlə apara bilmək üçün güclü orduya malik olmaq lazımdır”. Bu ideyanı cənab İlham Əliyev daha da inkişaf etdirərək güclü ordu yaratdı. Elə bir ordu ki, həm cəsarəti, həm igidliyi, həm də humanizmi ilə dünyada yeni bir əsgər, zabit obrazı yaratdı.
Zəfər Qələbəsini daha böyük coşqu ilə, fəxrlə qeyd edirik. Müzəffər Ordumuz Qələbə Paradında zəfər marşının sədaları altında qələbəmizin simvolu olan Xankəndində də zəfər yürüşü edəcək. Xankəndinin aydın səması, azad edilmiş hər qarışı zəfər qələbəmizə şahidlik edəcək. Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi. Təcavüzkar erməni əsgəri haqq uğrunda savaşan Azərbaycan əsgəri qarşısında dura bilmədi.
Prezident, Ali Baş Komandan İlham Əliyev də qeyd edirdi ki, sülhə nail olmaq üçün birinci yol hərbi, ikinci yol isə siyasi və iqtisadi olmalıdır. Bu reallığı 44 günlük Vətən Müharibəsi və onun nəticəsi olan 10 noyabr Bəyanatı və 2023-cü il sentyabr ayında 1 gün davam edən lokal xarakterli tədbirlər yaratdı. 2020-ci il sentyabrın 27-də Ali Baş Komandan, Ulu Öndərin bu sözlərini təkrarlayaraq, əmr verdi. Dövlət başçısı uzun illər Azərbaycanı irəliyə - tərəqqiyə, iqtisadiyyatın və ordunun inkişafına, müasirləşməyə aparıb və onun uzunmüddətli strategiyası ölkəmizi belə yüksək səviyyəyə çatdırıb, bizə düşmən üzərində belə nəzərəçarpacaq üstünlük verib. Ermənilərin 30 il işğalda gördükləri hər şeyin 44 gündə öhdəsindən və məğlubiyyətindən xəbər verir.
Zəfər qələbəmizdən sonra yaradılan Hərbi Qənimətlər Parkı hər bir azərbaycanlının fəxrlə ziyarət etdiyi məkandır. Hərbi Qənimətlər Parkına gələn hər bir insan Silahlı Qüvvələrimizin gücünü və iradəsini görür. 5 hektar ərazini əhatə edən Parkda eksponatlar arasında Silahlı Qüvvələrimizin işğaldan azad olunan ərazilərdə ermənilərdən qənimət götürdüyü 2 mindən çox hərbi avtomobilin nömrə nişanlarından hazırlanan və üzərində “Qarabağ Azərbaycandır!” şüarı əks olunan kompozisiya, Ermənistan tərəfindən törədilən müharibə cinayətləri, o cümlədən döyüş bölgəsindən uzaq olan ərazilərimizin raket zərbələrinə məruz qalması, dinc sakinlərin qətlə yetirilməsi və yaralanması barədə faktlar, düşmən tərəfindən Azərbaycan ərazisinə atılmış “İsgəndər-M” raketinin qalıqları var. Təqdim edilən eksponatlar, Vətən müharibəsinin gedişatı barədə məlumatlar Azərbaycana Zəfər qazandıran döyüşləri bir daha göz önündə canlandırmağa geniş imkan yaradır.
Bu gün dünya xəritəsində həqiqətən müstəqil siyasət yeritmək iqtidarında olan dövlətlər çox azdır və Azərbaycan öz gücü, iqtisadi və hərbi qüdrəti, müstəqil xarici siyasəti sayəsində belə azsaylı dövlətlərdən biridir - bunu biz Prezident İlham Əliyevə borcluyuq. İkinci Qarabağ müharibəsinin başa çatmasından cəmi üç il keçir, lakin Prezident İlham Əliyevin və Birinci vitse-prezident Mehriban Əliyevanın şəxsi nəzarəti altında işğaldan azad edilmiş ərazilər artıq transformasiya olunur: miqyası, sürəti və estetikası baxımından misilsiz işlərə başlanılıb. Keçmiş məcburi köçkünlər artıq Qarabağa və Şərqi Zəngəzura qayıdırlar və Qələbə bayramını öz doğma şəhərlərində və kəndlərində yeni evlərdə qeyd edəcəklər. Prezident İlham Əliyev həm geosiyasi, həm də geoiqtisadi mənada ölkəmizin regionda mütləq liderliyini möhkəmləndirərək Cənubi Qafqazda tamamilə yeni reallıq qurdu. Bu gün bütün dünya Orta dəhlizin - Şərqdən Qərbə və geriyə tranzit yüklərin ölkəmizdən keçən marşrutunun tezliklə işə salınmasının zəruriliyindən danışır. Bu marşrutun ən mühüm komponenti olan Zəngəzur dəhlizi Azərbaycanı Avrasiyanın ən böyük tranzit mərkəzinə çevirəcəkdir.
Azərbaycan bu gün qeyri-mümkün görünən layihələri, təşəbbüsləri həyata keçirən ölkədir. Azərbaycan indi yeni dövrə qədəm qoyur. Müstəqil, güclü, suveren dövlətin vətəndaşı olmaq isə xüsusi bir fəxrdir, qürurdur! Zəfərin mübarək, Azərbaycan!

Sevil Ağayeva,
"Asela.az" saytının baş redaktoru