“Crocus City Hall”da konsertə baxmağa gələn tamaşaçı terrorçulardan birini necə zərərsizləşdirməsindən danışıb
DÜNYA
“Crocus City Hall”da konsertə baxmağa gələn tamaşaçı terrorçulardan birini necə zərərsizləşdirməsindən danışıb
Ötən axşam Moskvada “Crocus City Hall”da “Piknik” qrupunun konsertinə baxmağa gələn tamaşaçı (ad açıqlanmır – red.) avtomatla silahlanmış terrorçulardan birini tərksilah edərək, onu zərərsizləşdirməyə nail olub.
O, bu barədə “Rossiya 24” telekanalına bildirib.
Həmin şəxsin sözlərinə görə, hücum zamanı həyat yoldaşı ilə kiçik zalda olub. O, insanlara atəş açan terrorçunun arakəsmənin arxasından çıxaraq avtomatına güllə ilə dolu yeni daraq taxdığını görüb.
“Mən həyat yoldaşıma baxdım, gözlərində qorxunc dəhşət gördüm və bir şey etməli olduğumu başa düşdüm”, - deyən həmin şəxs qaçaraq terrorçunun yanına gəlib və cəld onun silahından yapışıb, digər əli ilə isə terrorçunun başına bir neçə zərbə endirib. Digər tamaşaçı da onun yanına qaçaraq, terrorçunu zərərsizləşdirməyə kömək edib. Terrorçu zərərsizləşdirildikdən sonra onlar zaldan qaça biliblər.
Qeyd edək ki, ötən axşam Moskvadakı “Crocus City Hall”da törədilən terror aktı nəticəsində ölənlərin sayı 133 nəfərə çatıb.
FSB direktoru Aleksandr Bortnikov Prezident Vladimir Putinə konsert salonuna hücumla bağlı 11 nəfərin saxlanılması barədə məlumat verib.
