Azərbaycan ilə Gürcüstan arasında əlaqələr bütün sahələrdə sürətlə inkişaf edir. Azərbaycan daim Gürcüstanda yaşayan soydaşlarımıza diqqət və qayğı göstərir.
Bu fikirlər Azərbaycanın Gürcüstandakı səfiri Faiq Quliyevlə Gürcüstan Müsəlmanları İdarəsinin (GMİ) şeyxi Faiq Nəbiyev arasında görüşdə səslənib.
Səfir Faiq Nəbiyevi GMİ-nin şeyxi seçilməsi münasibətilə təbrik edib, ona fəaliyyətində uğurlar arzulayıb. Diplomat Azərbaycanın təşəbbüsü və birbaşa iştirakı, eləcə də Gürcüstanın da yaxından dəstəyi ilə regionda həyata keçirilən layihələrin əhəmiyyətindın danışıb, bu layihələrin xalqlarımızın rifah halının yaxşılaşmasına xidmət etdiyini vurğulayıb.
Bildirib ki, Azərbaycan dövləti Gürcüstanda yaşayan soydaşlarımızın müxtəlif sahələrdə inkişafı üçün dəstəyini heç vaxt əsirgəməyəcək.
Söhbət zamanı səfir Azərbaycan ilə Gürcüstanın sürətlə inkişaf edən strateji tərəfdaşlıq münasibətlərindən söz açıb, ikitərəfli münasibətlərin inkişafında soydaşlarımızın rolunu xüsusi qeyd edib.
Diplomat deyib ki, Azərbaycan-Gürcüstan münasibətləri bütün sahələrdə sürətlə inkişaf edir. O, Azərbaycan dövlətinin təhsil, mədəniyyət və din sahələrində həyata keçirilən sosial layihələrə dəstəyini yüksək qiymətləndirib, Azərbaycan Respublikası tərəfindən Gürcüstandakı məscidlərin təbii qazla təminatına görə təşəkkürünü bildirib.