Kursantlara həvəsləndirmə tədbirləri tətbiq ediləcək
Əsgərlər, matroslar və çavuşlar üçün nəzərdə tutulmuş həvəsləndirmə tədbirlərinin bəziləri kursantlara da tətbiq ediləcək.
Bununla bağlı Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında “Azərbaycan Respublikası Silahlı Qüvvələri İntizam nizamnaməsinin təsdiq edilməsi haqqında” Qanuna dəyişikliklər təklif edilib.
Təklif edilən dəyişikliklərə əsasən, hərbi qulluqçu hazırlayan xüsusi təyinatlı təhsil müəssisələrinin kursantlarına bir sıra həvəsləndirmə tədbirləri tətbiq ediləcək. Bu tədbirlər arasında kursantlara təşəkkür elan edilməsi, əvvəl verilmiş intizam cəzasının götürülməsi, fərman və qiymətli hədiyyələrlə mükafatlandırma, hərbi hissədə açılmış Döyüş Bayrağı yanında çəkilmiş fotoşəkillərlə mükafatlandırma, hərbi xidmət borcunu nümunəvi şəkildə yerinə yetirmələri və aldıqları mükafatlar haqqında məlumat verilməsi, əlaçı döş nişanı ilə təltif edilməsi və adlarının hissənin Fəxri kitabına yazılması kimi həvəsləndirmələr yer alır.
Hazırda mövcud qanunvericiliyə əsasən, kursantlara bu cür həvəsləndirmə tədbirləri tətbiq edilmir. Yeni təklif edilən dəyişikliklər kursantların intizamını və hərbi xidmətə olan bağlılıqlarını artırmaq məqsədi daşıyır.
