AZAL təyyarəsinin qəzaya uğraması ilə bağlı istintaq hesabatı bu ilin dekabr ayına qədər hazır olacaq
“Azərbaycan Hava Yolları” QSC-nin (AZAL) təyyarəsinin qəzaya uğraması ilə bağlı istintaq hesabatı 2025-ci ilin dekabr ayına qədər hazır olacaq.
Qazaxıstan mətbuatına istinadən xəbər verilir ki, bu barədə nəqliyyat nazirinin müavini Talqat Lastaev bildirib.
"Beynəlxalq Mülki Aviasiya Təşkilatının (ICAO) tələblərinə və tövsiyə olunan təcrübələrinə uyğun olaraq, istintaq bir il davam edir. Buna görə də, 2025-ci ilin dekabr ayına qədər yekun istintaq hesabatı tamamlanacaq", – deyə Lastaev qeyd edib.
Ötən il dekabrın 25-də Bakıdan Qroznıya uçan təyyarə Aktau şəhərinin bir neçə kilometrliyində qəzaya uğrayıb. Təyyarədə Azərbaycan, Rusiya, Qırğızıstan və Qazaxıstandan olan 62 sərnişin, eləcə də 5 ekipaj üzvü olub. Hadisə nəticəsində 38 nəfər, o cümlədən altı qazaxıstanlı həlak olub. 29 nəfər, o cümlədən iki bələdçi sağ qalıb.
