Azərbaycan Dövlət İnformasiya Agentliyi
CƏMİYYƏT
Rusiya İstintaq Komitəsinin sədri ilə Azərbaycanın baş prokuroru arasında telefon danışığı olub
29.12.2024.
Rusiya İstintaq Komitəsinin sədri ilə Azərbaycanın baş prokuroru arasında telefon danışığı olub
Bakı, 29 dekabr.

Rusiya Federasiyası İstintaq Komitəsinin sədri Aleksandr Bastrıkin ilə Azərbaycan Respublikasının baş prokuroru Kamran Əliyev arasında telefon danışığı olub.
Rusiya İstintaq Komitəsinin saytına istinadla xəbər verilir r ki, idarə rəhbərləri Qazaxıstan Respublikasının Aktau şəhəri yaxınlığında “Azərbaycan Hava Yolları” QSC-yə məxsus təyyarənin qəzaya uğramasının səbəbləri ilə bağlı aparılan araşdırmaların gedişini müzakirə ediblər. Təyyarədə iki ölkənin, həmçinin Qazaxıstan və Qırğızıstanın vətəndaşları olub. Söhbət rusiyalı müstəntiqlər və kriminoloqlar, Azərbaycan və Qazaxıstanın istintaq-əməliyyat qruplarından olan həmkarları arasında yaxşı qurulmuş hərtərəfli qarşılıqlı əlaqə barədə olub.

Aleksandr Bastrıkin əmin edib ki, Rusiya tərəfindən İstintaq Komitəsinin mərkəzi aparatının aviasiya qəzalarının təhqiqi sahəsində ən təcrübəli əməkdaşları cəlb olunub və onlar qabaqcıl məhkəmə-tibbi avadanlıqlarla təchiz olunublar. O əlavə edib ki, kompleks istintaq hərəkətləri həyata keçirilir ki, onların məqsədi baş vermiş faciənin bütün səbəblərini və onunla bağlı məqamları müəyyən etməkdən ibarətdir.

Söhbət zamanı tərəflər birgə təhqiqat planı çərçivəsində prioritet vəzifələri müəyyənləşdirib, bundan sonra da hərtərəfli əməkdaşlığa hazır olduqlarını bildiriblər.