Bakı, 30 sentyabr.

Stenford Universiteti bu ilin sentyabr ayında növbəti dəfə dünyanın ən yaxşı 2 faiz alimlərinin reytinq siyahısını təqdim edib.

Bu siyahı 2019-cu ildən başlayaraq hər il dərc edilir və o, dünyanın çox nüfuzlu akademik nəşriyyatı olan “Elsevier” şirkətinin “Scopus” elmmetrik bazasının bir il əvvəlki məlumatları əsasında hazırlanır. Reytinq siyahısı bir çox elmmetrik göstəricilər nəzərə alınmaqla çoxmeyarlı qiymətləndirmə əsasında hazırlanır.

İnformasiya Texnologiyaları İnstitutunun baş direktoru akademik Rasim Əliquliyevin adı bu ildə də həmin siyahıya daxil edilib.

Bu barədə institutdan məlumat verilib.

2020-ci ildən başlayaraq ardıcıl olaraq artıq 5-ci ildir ki, akademik Rasim Əliquiyev bu siyahıda yer alır. O, bu siyahıya dünyanın bütün ölkələrində süni intellekt sahəsində tədqiqat aparan və məqalələri “Scopus” bazasında indeksləşən 399 min 64 alimin arasından seçilib. Vurğulamaq lazımdır ki, digər elm sahələrinə nəzərən ən böyük rəqabət məhz süni intellekt sahəsində olub.

Stenford Universiteti yuxarıda qeyd olunan siyahıdan başqa, hər il eyni metodika əsasında, lakin uzunmüddətli dövrü əhatə edən ikinci (“karyeraboyu təsir”) siyahını təqdim edir. Belə ki, əgər birinci siyahı tədqiqatçının hesabat ilindəki (yəni 2023) elmi nəticəsinə görə hazırlanırsa, “karyeraboyu təsir” siyahısı tədqiqatçının 1996-cı ildən hesabat ilinə qədərki (1996-2023) dövrü əhatə edən elmi fəaliyyətinin nəticəsi əsasında hazırlanır.

İnstitutun şöbə müdiri AMEA-nın müxbir üzvü Ramiz Alıquliyev 2024-cü ildə süni intellekt sahəsi üzrə “karyeraboyu təsir” reytinq siyahısında yer alıb. O da bu siyahıya 399 min 64 alimin arasından seçilib. Ramiz Alıquliyev 2020-2023-cü illərdə süni intellekt sahəsində dünyanın ən yaxşı 2 faiz alimlərinin reytinq siyahısına daxil edilib.