AŞPA-dan istifadə edən Fransa qərəzli mövqeyi ilə Azərbaycana qarşı təzyiq göstərməyə çalışır
CƏMİYYƏT
AŞPA-dan istifadə edən Fransa qərəzli mövqeyi ilə Azərbaycana qarşı təzyiq göstərməyə çalışır – ŞƏRH
26.01.2024 [16:50]
AŞPA-dan istifadə edən Fransa qərəzli mövqeyi ilə Azərbaycana qarşı təzyiq göstərməyə çalışır – ŞƏRH
Bakı, 26 yanvar.
Fransa qərəzli, ədalətsiz mövqeyi, qəbul etdiyi müəyyən qərarları ilə Azərbaycana təzyiq göstərməyə çalışır. Bununla da Ermənistan və onun havadarları olan Qərb ölkələri sanki çalışırlar ki, sülh imzalanma prosesini növbəti 30 ilədək uzatsınlar. Vətən müharibəsi və ondan sonrakı dövrdə Fransa Azərbaycana qarşı BMT-nin Təhlükəsizlik Şurasında bir neçə dəfə qətnamə qəbul olunmasını müzakirələrə çıxarmaq üçün cəhdlər göstərib.
Bu məsələni şərh edən hərbi ekspert Ədalət Verdiyev deyib ki, bu cəhdlərin heç biri uğurla nəticələnməyib. Amma son dəfə yenə də Fransa Senatı Azərbaycana qarşı qərarlar qəbul etməyə çalışdı. Senat Ermənistanın ərazi bütövlüyünü dəstəkləyən qətnamə qəbul etsə, bu sənədin ölkəmizə təsiri olmadı. Azərbaycan bütün həmin qüvvələrə qarşı mübarizə apardı.
Onun sözlərinə görə, hazırda AŞPA Fransanın əlində oyuncağa çevrilib. Fransa bu təşkilatdan siyasi alət kimi istifadə edərək Azərbaycana qarşı əks təbliğat kampaniyası həyata keçirir. AŞPA-nın son addımı Fransanın tarixi Zəfərimizdən sonra Azərbaycana qarşı açıq müstəviyə keçən qərəzli kampaniyasının davamıdır. Bu kampaniyaların tərkib hissəsi kimi Fransa Senatının bu yaxınlarda qəbul etdiyi qondarma qətnamə və sair addımların önəmi yoxdur.
Ermənistan və onun havadarları Azərbaycanın real gücünü, imkanlarını nəzərə almalıdırlar
Hərbi ekspert xatırladıb ki, Azərbaycan Cənubi Qafqazın lider dövlətidir və onun sayəsində regionda ilk dəfə sülh bərqərar ola, etimad mühiti yarana bilər. Bunun üçün real şanslar yaranıb.
“Düşünürəm, Ermənistan və onun havadarları, o cümlədən Fransa Azərbaycanın real gücünü, imkanını nəzərə almalıdırlar. Qarşılarında Azərbaycan kimi güclü dövlətin dayandığını görməlidilər. Ölkəmiz müharibə vaxtı düşmənlə bir neçə cəbhədə mübarizə apardı, heç birinə məğlub olmadı və geri addım atmadı. İndi bəzi qüvvələr ölkəmizin möhtəşəm Qələbəsindən narahat olaraq Azərbaycana qarşı bəyanatlar qəbul edə bilərlər. Amma bu reallığı dəyişməz. Ona görə ki, məğlub Ermənistanı xilas edə və vəziyyəti dəyişə bilməz. Fransanın konserv bankası - sınıq-salxaq “Bastion” maşınları ilə Ermənistan ordusu bərpa olunmaz. Çünki ölkəmizə qarşı hər hansı real təhlükə yaransa, o preventiv addımlarla istənilən nöqtədə məhv ediləcək. Ermənistanın müharibədə milyardlarla maliyyə vəsaiti itirib. Ermənistan nəzərə almalıdır ki, kimlərinsə silahı ilə Azərbaycanın qarşısını ala bilməz. Biz kiminsə məhv olmasını istəmirik, çünki gündəliyimiz sülhə xidmət edir. Azərbaycan Ermənistana sülh əl uzadıb və o isə həmin əli tutmalıdır. Tutmayacaqsa, əlimizi büküb havaya qaldıracağıq. Bunun ikinci alternativ yoxdur. Əlimizi daim yuxarıda saxlaya bilmərik”, - deyə Ə.Verdiyev vurğulayıb.
